طاولة الصيانة مواصفاتها وافضل المعدات عن تجربة شخصية كمهندس صيانة ومدرب .

اولا مواصفات طاولة الصيانة :

1️⃣ بفضل تكون من الخشب ( الزجاج السوكريت والرخام بيسرطنوا وبيتكسروا وبيحصل من وراهم مشاكل ) وبلاش تدهن الخشب بفضل تلزقه فينيل عشان مايبوظش الدهان من السوائل اللي بنشتغل بيها وسهل تنظيف الفينيل .

2️⃣ ارتفاع طاولة الصيانة ( في زمن الميكروسكوب والعدسة النص ) لا يزيد عن 70 سنتيمتر ( سيبك من المكاتب الجاهزة وهات نصف لوح خشب هايكفيك ويفيض ) وامسكه من اسف بزوايا حديد .

3️⃣ كرسي بمساند ولا يشترط يكون متحرك الاهم يكون بمساند .

ملحوظة خلي ظهرك مستقيم طول الوقت وانت قاعد .

ثانيا مواصفات المعدات : ( ملحوظة هامة جميع المعدات سترتب حسب السعر من الاقل للاعلي ) .

1️⃣ #الميكروسكوب : وهو الاداة الاهم حاليا في الصيانة وبفضل يكون بصري مش ديجيتال .

ونصيحة بعد تجربة عشرات الميكروسكوبات ( الموديل والنوع ليس لهما قيمة علي الاطلاق ) مصانع الميكروسكوبات في الصين معدودة علي الاصابع وكل الشركات اللي حضرتك شايفها بتاخد وتحط اللوجو بتاعها .

وجميع الميكروسكوبات رؤيتها بتبهت مع الوقت حتي الياباني والامريكي وبيحتاج تنضيف .

كاميرا الميكروسكوب اوعي تشغل بالك باللي مكتوب عليها والدليل علي كلامي الناس اللي جربت اكتر من كاميرا الميكروكنترول اللي بداخلها بيتعرف علي الكمبيوتر تعريفين او ثلاثة اشهرهم h1600 .

جرب الميكروسكوب بنفسك قبل ما تشتريه بالعدسة النصف وبدون العدسة النصف .

فرق العدسات - بالترتيب - 0.3 , 0.5 , 0.7 كل مالرقم بيزيد الزوم بيزيد ومساحة العمل تحت الميكروسكوب بتقل .

عن نفسي بشتغل بالعدسة 0.5 طول الوقت ومع الحفر والاماكن الدقيقة بخلع العدسة خالص .

2️⃣ #الهوت_اير : هاعدد انواعه حسب المقدرة المادية تصاعديا ومميزات كل واحد وعيوبه ( من وجهة نظري ومش شرط الحلو معاك يكون وحش معايا كل شيخ وله طريقة ) .

QUICK 706 : الحل الامثل لبداية طريقة للاحتراف ثبات في الهواء والحرارة وكمان معاه كاوية عادية للشغل اليومي ( هاتركب علي الكاوية سن عريض تشانلي او ماانت وهاتبقي فلة ) .

اشتغلت عليه سنة ونص كل حاجة معالجات وذواكر وخلافه ونسبة نجاحة كانت عالية جدا بفضل الله .

عيوبه هواه ضعيف سيكا بالمقارنة مع العمالقة وكذلك وجود كاوية هايقسم قدرته ( الوات ) علي نصفين .

QUICK 857 : نفس اللي قبله بالظبط مميزات وعيوب ولكن بدون كاوية هانستثني عيب تقسيم الوات لانه بينزل بدون كاوية وبالنسبة للغير مقتدر هايضطر يشتري جنبه كاوية .

QUICK 2008 : هوت اير عالمي في المعالجات والذواكر ( هواه ناعم ودوراني قد يتخيله البعض ضعيف ) فيعتبر الافضل علي الاطلاق في الايسيهات كبيرة الحجم ( هايوفر عليك حركة ايدك وتوزيعة الهواء ) ولكن لا افضل للشغل اليومي من سوكتات ومكونات وخلافه هاتاخد وقت علي ما تتعود عليه وماتمسكش دراعه من فوق .

QIUCK 858 : نفس الهوت اير السابق 2008 بنفس الدراع ونفس القدرة ولكن بدون قنوات تخزين ( وانا عن نفسي شغال بيه لاني بستخدمه فقط اثناء رفع معالجات وذواكر الاندرويد الطبقة الواحدة ) يفضل تشتريه جمب اي هوت اير هواه كمبروسر او مستقيم .

ATTEN : ومش فاكر موديله الصراحة بس هو مشهور عن ناس كتير الهوت ايد دا رهيـــــــــــب كاندفاع هواء ولكن هاتحتاج تعايره .

الهوت اير دا انا ظلمته وناس كتير ظلموه بسبب زر تشغيل الهواء فيه لقطة ماكنش حد يعرفها ( وهي ان ضغطة طويلة علي الزرار دا بتفصل السخان ويكتب علي الشاشة COOL وطبعا بنعتبر السخان باظ ) ومع ذلك قطع غياره بدأت تبقي متوفرة .

SUGON : هوتاتها ملانة عيوب وبتضرب شمعات وانا لابس واحد بظبطه علي 200 يعطيني 400 حتي بعد المعايرة ( لو فلوسك عزيزة عليك بلاش منها ) ... هايطلع واحد يقولي معايا زي الفل ؟؟؟ حضرت حالة وفيه الالف غير زعلانين منه .

QUICK K8 , QUICK 8686 : الهوتين دول حكاية وشغال علي K8 في مكتب القاهرة ماشاء الله عليه بس مش نفس قوة هواء 861 اللي هاتكلم عنه دلوقت .

QUICK 861 : العملاق بدون منازع هواء وحرارة من الاخر لو في عروسة في احلامك فاكيد الهوت اير دا احلي منها ( ربنا يرزقكم جميعا وتشتروه ) .

QUICK 881 : هو تحسه واخد سعر اكبر من حجمه ( انا بشتري هوت اير هواه دوراني وناعم وشد تحت ناعم خط زي 2008 او 858 عشان ارفع بيه ذواكر ومعالجات ) ليه ادفع المبلغ دا ( اغلي من 861 ) في هوت هواه دوراني وشديد وانا مش هاستفيد بيه ؟ ( من عيوب الهواء الدوراني التاثير علي مساحة كبيرة من البوردة حتي مع خفض الهواء او تركيب اصغر فوهة ) .

هانخرج الكادا وال MR من الحسبة لعدم الانظام ولاحتياجهم المعايرة طول الوقت .

3️⃣ #الكاوية : هانقسمها قسمين اساسين ( شغل يومي , لحامات دقيقة )

اولا الشغل اليومي :

936 : ودي كاويات منتشرة كتير واقل من العادية بس بتنطق لما تركب عليها السن التشانلي QIANLI السكينة او الماانت MAANT

T12 : ودي مش فارق معايا اي جهاز او وحدة بتشغلها ولو ان افضلهم من وجهة نظري شركة GVM وافضل سن ليها بعد تجارب كتير MAANT و MIJING .

T245 : اي كاوية بتشغل سن C245 رهيبة للشغل اليومي لان السن دا صعب جدا يفقد الحرارة بتاعته .

ثانيا اللحامات الدقيقة : هانقسمها ( مايكرو و نانو )

مايكرو : سنون C210

T210 : كاوية جميلة وعلي قد الايد وسيبك من موضوع بتحرق السنان ( السنون اللي بتيجي معاها زبالة اساسا ) ركبلها سن من نوعية GVM او XSOLDERING وادعيلي .

T3B : كاوية لذيذة وشغال بيها اساسية معايا في مكتب القاهرة بس فيها عيب الحساس في القاعدة وحله هاتحط الدراع بالسن مكان تغير السنون بالاعلي وفيها ميزة ممكن تركب عليها السن النانو بدراع خاص بيه ولكن مش هاتشغل الميكرو والنانو مع بعض ( وبردوا فكك من السنون اللي جاية معاها مش احسن حاجة ) .

A9 : ودي كذا شركة نزلتها منها SUGON و AIFEN جربت السوجون منها وجميلة جدا ماشاء الله بالمقارنة مع سعرها والاعلي منها .

SUGON T26D : كاوية حمولة وثابتة جدارة ومكتسحة السوق ولكن سعرها رفع كتير الفترة الاخيرة فانا بعتبر ال A9 افضل منها حاليا بالمقارنة بالسعر والوات .

JBC C210 : وطبعا دي انتاج اسباني في حتة تانية بتعزف منفردة مع نفسها واوعي تقارنها باي حاجة من اللي فاتوا ولو معاك فلوس اشتريها حتي لو كانت من انتاج مصنع JBC في الصين .

نانو : سنون C115

T115 : ودي شعبية افضل وحدة اشتريتها GVM وجميلة ماشاء الله عليها بس بردوا فكك من السنون اللي جاية معاها .

T3B : ودي اتكلمنا عنها في المايكرو هي نفس الوحدة بس الدراع والسن مختلف .

هانتكلم بقي دلوقت عن الكاويات بروحين او بذراعين .

جربت منهم قطعتين :

AIFEN A902 : ودي اشتريتها بس الصراحة لسه ماجربتهاش وماتعودتش اقول رأي في حاجة الفترة الاخيرة ( بعد مشاكل الهوت اير السوجون في السوق وكنت رشحته للناس في فيديو من تجربة مبدأية وندمت ) الا لما اجرب بنفسي .

AUXIN T420D : كاوية جميلة جدا شغال بيها علي مكتبي في دكرنس .

4️⃣ #الافوميتر او #الملتيميتر :

SUNSHINE DT19N : مبدأيا كويس بس مشكلته بطارياته بتخلص بسرعة ومعايرته مش احسن حاجة ( لو معاك فلوس الاعلي فكك منه ) .

SUNSHINE DT17N : نقدر نقول وحش الصين واللي مكسر الدنيا وحاجة جميلة في المتناول نوعا ما واغلب الناس شغالة بيه واغلب برامج المخططات داعمة قراءاته وبيقبل بطارية 9 فولت وممكن تشتريله واحدة بتتشحن ( بنصح بيه ) .

FLUK 101 : وطبعا دا كمعايرة شئ عالمي مافيش عليه خلاف والبطاريات فيه عمرها طويل نسبيا ولذيذ كحجم ( بنصح بيه ) .

SUNSHINE DT19MS : ودا افوميتر واسيليسكوب لا انصح بيه تحسها فلتت منهم وماعرفوش يظبطوها .

HANTEK 2C42 : افوميتر محترم معايرة قريبة جدا من الفلوك وشركة عالمية وكذلك اوسيلوسكوب هايفيدك في المذبذبات وحالة المسارات وسويتشات الملفات .

#️⃣ #الاوسيسكوب حاليا شغال ب ( UNI-T UPO2104E ) داعم لي بروتوكولات تواصل كتير واربع قنوات .

5️⃣ #الباورسبلاي : ( هانستثني من حساباتنا اي باور سبلاي 3 اصفار فقط زي الشكل دا 0:00 ) .

MECHNIC DSP15D5 : حلو ولذيذ بس فيه خاصة OCP مش هاتعرف توقفها فهايرخم عليك في الحقن وتضطر تهدي الجهد ( مافيها مشكلة الحركة دي ) .

SUNSHINE P3005a,d: الباور سبلاي المحترم ابن الناس ومش هاقول اكتر من كدا لان اغلب الفنين شغالين بيه وخد بالك فيه نفس الموديل بالضبط بنفس الشكل انتاج شركة KORAD مايفرقش عنه حاجة بل ان الاصل في الموضوع كان الكوراد وصن شاين قلدته .

SUGON 3005 : مازلت عند رأي بلاش منه بيخرف في الفولت والتيار وعايز واحد فاهم يعاير كل شوية وتفك طقم المسامير وتتعايش معاه ( بالنسبة للفني اللي شغال علي عماه ممكن يلبسه في حيطة والشركة نفسها اعترفت بالموضوع ونزلت اصدار احدث ) .

YIHUA 3005D : جميل جدا وابن ناس بحطه بنفس الخانة مع الصنشاين .

UNI-T : مش فاكر موديله بالتحديد بس هو حلو بس سعره مبالغ فيه سيكا .

AUXIN P2408S : لو وصلت مرحلة عالية من الاحتراف او اغلب شغلك معالجات او ايفون لازم يبقي عندك ( باور سبلاي وبيعرض علي الكمبيوتر وتيستر شحن وبينزله تحديثات وليه كابل وبردة شحن بطاريات الايفون وليه بوردة اعادة ضبط لبطاريات الايفون وشورت كيلر لحد 8 امبير ) .

6️⃣ #تيستر_الشحن : هانستثني اي تيستر شحن صفرين من حسابتنا 0.0 بلاش تشتريه دا اخره يقولك بيشحن ولا لا .

MAANT MY100-C : ترشيحي الاول لبداية طريقة لاحتراف تحديد الاعطال باستخدام التيستر ( تيستر شحن متعدد وممكن تختاره فردي و 0.000 اربع اصفار وبيشتغل USB HUB للكمبيوتر USB3.0 ) بس هاتحتاج معاه راس شاحن اصلية اصلية توكيل .

SUNSHINE SS-309WD : جميل جدا واشتغلت عليه فترة طويلة وفيه شحن لاسلكي وشغال متعدد بس عيبه لو موصل اكتر من جهاز لازم تركز الشاشة بتعرض اي مدخل فيهم .

UNI-T UT658DUAL : جميل جدا بس برضوا هاتحتاج معاه راس شاحن اصلية اصلية توكيل وبيفحص خطوط الداتا ( ميزة جميلة ) وبيفحص مدة الشحن وسعة البطارية مشكلته انه منفذ واحد فقط .

MAANT DIAN BA NO1 : اشتريته ولسه ماجربتوش بس شكله كدا حاجة بنت ناس .

FNIRSI FNB58 : دا تيستر من المريخ اللي عملتله الفيديو المقدمة المبارح واخدت قرار ماعدتش شغال الا بيه لان ابحاثي كلها هاتقوم عليه بامر الله الفترة الجاية .

7️⃣ #الشبلونات : انا بختار اي شبلونة من الشركات دي فقط QIANLI MIJING AMAOE دول اللي مجربهم ومعايا فل الفل .

هتحتاج كبداية لو شغال ايفون شبلونة لكل موديل ( لكل معالج ) .

فكك من الشبلونات ال 3D بقيت برتاح في العادية .

لو شغال اندرويد هاتحتاج شبلونتين يونيفرسال عشان بيتهلكوا بسرعة وشبلنة ذواكر وبعد كدا رتب معالجاتك كل ماتحتاج هات .

الشبلونات ال 4D بالقاعدة المغناطيسية نازل اثنين للمعالجات داعمين ايفون والاندرويد الحديث تقريبا الاثنين واحد سواء MIJING او MAANT .

8️⃣ #الدريل : جربت كذا نوع دريل قلم وافضلهم علي الاطلاق ال MIJING

وطبعا في دريل الماني من نوعية STRONG 204 بس دا لفل الوحش .

9️⃣ #القصدير السائل : هنا مش هاتكلم عن نوع قد ما هانبه علي نقطة مهمة جدا جدا جدا اشتريه جدييييييييد لسه نازل ماتشتريهوش مركون عند تاجر .

افضل نوع شغال بيه حاليا 2UUL سواء 148 او 189 وطبعا كل درجة حرارة حسب استخدامك واحتياجك .

بردوا ال MIJIN و MAANT حلوين وولاد ناس بس اشتريهم جداد .

سوء التخزين او الشحن ليه عامل كبير في جودة القصدير .

ترك العلبة مفتوحة بيدمر القصدير .

🔟 #الفلكس : كل اللي في السوق مضروب مافيش حاجة اسمها AMTECH الاصلي لان الاصلي انت فعلا في مصر مش هاتقدر علي ثمنه .

كل ما الفلكس لونه يميل للبياض الغير شفاف اعرف ان فيه نسبة جلسرين عالية ودا مش هايخرج ابخرة كتير ومش هايتعب صحتك بس هايضايقك شوية في التنظيف .

كل ما الفلكس يكون شفاف او مايل للاصفرار الشفاف هايكون رهيب لحامات بس ابوس ايدك ماتشمش الدخانة اللي طالعة منه تجنبها قدر المستطاع .

1️⃣1️⃣ #الجفت او #الملقاط : انسي الجفتات التتانيوم من وجهة نظري سعر زيادة في الفاضي لو جربت الجفتات ال MAANT او 2UUL او QIANLI هاتدعيلي دعوة حلوة ( نقيه سنه من جوه مبطط هايكلبش في الايسي والمكونات ) .

1️⃣2️⃣ #حامل_البوردات : الافضل حاليا بدون اي مقارنة مع غيره MIJING K23Pro رهيب رهيب رهيب ايفون واندرويد وتجاويفه من المنتصف جميلة اوي مع بوردات الاندرويد .

1️⃣3️⃣ #غسالة_بوردات : كنت طلعت في لايف بغسالة BAKU بس للاسف مش موجودة في السوق حاليا .

لو عايز حاجة كويسة هات السن شاين اللي جسمها الخارجي معدن هاتمشي الحال .

1️⃣4️⃣ سوائل بشكل عام :

التنظيف : انا بستخدم ثنر حار ويفضل تختبره علي البوردة لانه اوقات بيجي مغشوش فلو جيير او اكسد علي سطح البوردة فكك منه وشوف تاجر تاني او نوع تاني .

العزل : اي مادة UV SOLDERING MASK مش شرط النوع المهم الصلاحية وتعينها بعيد عن الضوء والاهم الكشاف يكون قوي .

1️⃣5️⃣ رفايع ولوازم اخري :

الشيلد : بفضل حاجة من اتنين يا SOLDERING WICK اللي بيسموه الامريكي في العلبة المعدينة يا GOOT WICK اللي بيسموه الياباني .

سيلك البريدجات : هاته كله معزول بفضل المعزول عن المتقصدر الجهاز وبشتغل ب 0.1 او 0.02 حسب تحمل المسار للامبير .

اسلحة التنظيف والرفع : في طقم معفن بتاع باغات في الاصل ب ٢٥ جنيه ،،، تخيل دا اجمل سلاح ترفع بيه .

حط معاه اسلحة Qianli 007 , 008 , 009

وماتنساش المشارط الطبية رقم او مقاس ١١ و ١٥

1️⃣6️⃣ #البريهيتر او سخان بوردات الايفون : اللي لسه ماشتراش قدامك حاجة من اثنين :

Welie : ارخص سخان وجميل وشغال بيه

Auxin iheater pro. : الاقوي علي الاطلاق حاليا وماتفكرش في غيره

اهم شئ ابعد عن السخان الصنشان مش متعاير حراريا واغلب المشاكل بتحصل منه .

هاتوقف لحد هنا عشان الصراحة تعبت من الكتابة ويارب الناس تستفيد من المقال دا ويكون مرجع ليكم .

بالتوفيق للجميع ❤️

#عمر_منيع #يلا_موبايل #الفهم_اولا